Assam nung Abdul Kalam Centre lapoktsü: Tarun Gogoi

Guwahati, July 31 (Agencies): Kobi melii Assam nung Innovation Centre ka lapoktsü aser iba Centre nüngjaji taoba Tir APJ Abdul Kalam nüngtem nung jatsütsü, ta Brihostibar aonung state Chief Minister, Tarun Gogoi-i sangdong ka ajanga ashi.
Gogoi-i, kobi melii Centre ji lapoktsü aser iba centre ajanga state aser northeast nung lanurtem shishilembabaren, tasa tasen apiteta inyakba aser purapitetba nung yaritsü, ta ashi.
“Scientist mongin, takoktet meimchir aser mongin tesayur (Kalam) nüngtem nung lapokba Centre-ji ajanga lanurtem shishilembabaren, tasa tasen apiteta inyakba aser purapitetba nung yaritsü, koba ajanga nüburtem libaliro melenshitsü aser pei jak nung menürem alitsü,” ta Assam chief minister-i ashi.
Taoba mapang linük Tir Kalam Hombar nü Indian Institute of Management, Shillong kaketshirtem nem lecture ka agütsüba mapang ajungbena asü.
India nunger missile programme tashi itdaktsüba aser 1998 küm linük nuclear raraba oset tendangba nung tongti shilem agiba ajanga Kalam-i linük nung jenjang tajung ngutet.
Pa tasümang Brihostibar nü Rameswaram (Tamil Nadu) nung remtsüogo.