Assam nung Afspa ita 6 atsülanger

New Delhi, November 05 (Agencies): 1990 küm nungi Assam ya “Distrubed Area” ta sangdonga liasü, aser maneni sorkari iba state ya disturbed area ta sangdonga Assam aser arrtsü state Meghalaya nung kilometer 20 telungtet nung Afspa ita trok atsülangshiogo.
Home Ministry-i, telungpur teloktem ajanga Assam nung tzüzüng ozüng tensa ya maneni tebilemtsü ka lir, aser January-September 2016 mapang nung Assam nung rara tatalokba 66 nung telungpur telok balala densema lir, aser item tatalokba nung nisung 66 süogo, ta metetdaktsü.
“Iba tesem nung telungpur teloktemi maneni longjemtsü, tashi itshitsü aser state nung züngsem tasen shimoktsü atema inyaker, aser shishilembartem, süngolu kiburtem, contractors, commercial garitem, khu belenertem, sorkar ketdangsertem aser yimtenren nisungtem dang nungi rakzükraktemer,” ta ministry-isa metetdaktsü.
“United National Liberation Front of Western South East Asia (UNLFW) ya April, 2015 nung tentet, aser iba tentet nung adener ULFA(I) aser NDFB(S) nati rara adokdaktsütsü atema inyaker aser taküm state nung rara shilem 57 aser nisung asüba shilem 84 bo parnok ajanga lir,” ta Home Ministry nung Joint Secretary, Satyendra Garg-i metetdaktsü.
August 5, 2016 nü Kokrajhar jila tezülen shishilembaba tesem ka nung NDFB(S) telungpurtemi nisung 14 kahset aser 19 yirutsü, aser ULFA(I) telungpurtemi Tinsukia district nung Hindi oshi jembir ana kahsetba den August 12, 2016 nü Tinsukia nung IED pongu aser Charaideo district nung IED ana pokdaktsü.
“Anungji Assam tesem ajak aser Assam den arrtsü Meghalaya nung kilometer 20 telungtetji maneni Armed Forces (Special Powers) Act, 1958 Section 3 kübok ‘disturbed area’ ta November 3, 2016 nungi ita trok atsülanger,” ta sangdong nung shia alir.
Centre sorkari disturbed area ta sangdonga Assam nung mezüng Armed Forces (Special Powers) Act (Afspa) benokbaji 1990 küm November 27 nü liasü.