Assam nung AGP & BPF nem LS menden 4 agütsütsü

Guwahati, Chiteni (July) 2 (Agencies): Asom Gana Parishad (AGP) aser Bodoland People’s Front (BPF) teloktem peladaktsütsü atema sangküm Lok Sabha election nung BJP-i parnok nem menden pezü agütsütsü bilemer.
Assam nung Lok Sabha menden 14 lir aser BJP menden 4 parnok den yariteper nem agütsütsü akok.
“BJP-i AGP aser BPF den yaritepa Lok Sabha election nung tokteptsü. Onok den yariteper nem menden kar yutsütsü. Onoki menden pezü agütsütsü akok aser itemji AGP nem 3 aser BPF nem ka asütsü akok” ta Assam nung BJP lennir kati ashi.
Taoba parliamentary election nung AGP-i menden 11 nung aser BPF-i menden nung toktepa liasü. Ajisüaka, telok anaprongi menden ka nung danga takok mangu. BJP-i menden 13 nung toktep aser tenet nung takok nguteta liasü.
Assam nung BJP-i AGP aser BPF den yaritepa teloktep sorkar ka kümteta lir.
BJP-i ‘coalition’ tangatetba akangshir ta ashir saka BJP den yaritepba teloktemi Citizenship (Amendment) Bill, 2016 anema noktakba mapang ka nung LS election nung menden lemzüktsütsü indang olen jembir asütsü.
Centre nung BJP-i aniba sorkari Citizenship (Amendment) Bill, 2016 agizükra aser Assam Accord anema inyakra teloktep sorkar nung madentsü ta AGP-i amokmerenogo.
Metsüremi (March) 24, 1971 nü yangluba Assam Accord sülen AGP ya tenteta liasü. 1980s mapang küm trok tashi bendangertem anema noktaka aruba sülen iba Accord yanglu. Bangladesh nungi aruba non-Muslim nungertemi Assam amokbangtsü ta AGP-i ashir.
BJP central committee-i teyaritepertem den menden lemsatsü indang telemtetba agitsü aser central committee-i kechi lemtetdir ibaji state BJP-i agizüktsü, ta State BJP general secretary Dilip Saikia-i osangbener dang ashi.
BJP national president Amit Shah-i North East Democratic Alliance (Neda) kübok Lok Sabha election nung tokteptsü atema jembiogo.
Northeast nung parliamentary menden 25 aliba nungi 21 nung takok angutsü atema Amit Shah-i alizüng ayuba metetdaktsüogo.