Assam nung AIIMS tesem anasa rara adoka police 12 yiru

Raha (Assam), July 15 (Agencies): Assam nung AAIMS amenoktsü aliba tesem, Kamrup kübok Changsari nungi Raha-i belentsü atema takhangba agüja longkak aitertem aser police na tsüngda raradang police 12 densema tajemba nisung 13 yiruogo.
Tanü longkak aitertemi security sepaitem dak lung agi aondang Additional Superintendents of Police ana densema police 12 yiru. Police-ia lokti senshidaktsütsü atema tenük aamtsü bomb akahba den ajok agi azük aser anünglen injanga kahdoka liasü, ta Nagaon Superintendent of Police, Yshey Tshewang Gyatso-i metetdaktsü.
Gyatso-i, “Onok Additional SP ana- Hiranya Kumar Barman aser Abdel Quadir Arief nata yiruogo. Onok ajak merang korang sema aliba ajanga shinga tashii meyiru,” ta ashi.
Longkak aitertem jagi Assam nung AIIMS amenoktsü aliba tesemji Nagaon district kübok Raha-i belentsü akhanger.
Longkak aitertem rongnungbo nisung ka dang yiru, aser ibajia pa asemba mapang tangari ajemba dang liasü, ta ketdangserisa ashi.
Ajisüaka longkak aitertemibo, parnok nisung 50 dak tema yiru ta shiogo.
Tanep nisung 2000 shi adenshia AIIMS ji Changsari nung masü saka Raha nung amenoktsüla ta takhangba agüja Raha nung NH 37 nokdanger longkak aita liasü.
“Lower aser Upper Assam sentaktepba aser tanga NE state tem den sentaktepba highway ji iba ya dang lir. Anungji onoki parnok dang gari senzütsü atema iba lenmangbosa lapoktsütsüla ta mepishi. Ajisüaka parnoki tashi mangai onok dang long agi aon tenzük,” ta Gyatso-i ashi.
Longkak aitertemji mazüoktetba ajanga tesülen police-i tenük aamtsü mozü kahloktsüba den ajok amshitsüsa akum, ta paisa ashi.
Changsari nung sen crore 1,000 intoka yipten 750 aliba AIIMS amenoktsü atema June 28 nü sorkari Centre sorkar nem ali acre 571 dak tema agütsüogo.