Assam nung Bangladesh nunger kiralongrar pezü puogo

Guwahati, August 25 (Agencies): Bodhbarnü Assam, Karimganj district kübok melung melemteti Bangladesh nunger kiralongrar pezü ISIS nung adentsü atema Saudi Arabia-i aotsü merangdang puogo, ta Brihostibarnü police ketdangsertem osang ka ajanga metetdaktsü.
Assam police tongti ketdangser kati, Bangladeshi telungpurtemji Meghalaya tsütsülen Umkiyang tesem ajanga Indo-Bangladesh arrtsü ajangadanga India telungi ait aser Karimganj district, Kaliganj tesem nung para ki ka nung liasü, ta ashi.
Police ketdangserisa, “Telungpurtemji ISIS nung adentsü atema Saudi Arabia-i aotsü sentong liasü. Parnoki local nisung ka teyari ajanga taila passport angu. Ajisüaka onoki parnok puogo,” ta ashi.
Tang pua alirtemji Bangladesh, Dhaka Café amakba nung densema liasü südi ta melung melemi bilemer.
“Onoki Bangladesh ketdangsertem nem iba osang metetdaktsüogo,” ta ketdangserisa ashi.
DIG ka leniba nung Assam police telok ka Karimganj-i ogo aser osang taliba bendentsü atema asüngdangyadar.
Kiralongrartemi Dhaka amakba sülen Bangladesh ketdangsertemi India dang, telungpur tajemba agi nisung pongu Meghalaya ajanga India telungi aitogo, ta tamalen metetdakja lir.