Assam nung Bank account 10,000 dak tema IT-i mitdar

Guwahati, December 13 (Agencies) : Demonetisation sülen IT department-i shibangtsür aliba senpaktem aika bank account nung inokba osang tejangja angashiba sülen Assam nung bank account 10,000 dak tema Income Tax department-i metoktsüi mitdar.
IT ketdangser rongnung tekolak kati ashiba agi, sen tejenba shibangba sülen department-i item account tem mitadar.
“November 10, 2016 nungi tenzüka onoki bank branch aika dang shibangtsür aliba sen aika inokba account tejangja meshiogo,” ta kasa ketdangser jagi ashi.
“Tawa state tesem balala nung sen 2000 senpak tasenba apuba sülen onoki bank branch tem nung maneni tenük yokdar,” ta IT ketdangser-isa ashi.
December 12, 2016 nü Guwahati nung IT department aser Assam police CID na lokteper mita aoba mapang shishilembar ka ket nungi senpak tasen, sen crore 1.55 shi apu.
Iba sen tasentem ya Hardeep Singh Bedi’er kidang apu.
IT ketdangser jagisa ashiba agi, bank nung inyaker ka teyari dena Hardeep aser ward councillor nati iba sen kidang aliba temai adoka ashi.
“Onoki iba iba tatalokba kanga shishia agir aser kuli tejangja bushitsü atema bushisüngdangtsü,” ta pai ashi.
Taoba hopta Guwahati city police-i Hatigaon tesem nungi sen tasenba, sen lakh 20 den nisung pezü pua lir.