Assam nung Bank manager pua bener aruogo

Guwahati, August 09 (Agencies): Assam yimtiba Dispur nung aliba Induslnd Bank nung deputy branch manager inyaka lia customer pezü indang account nungi sen crore 3.70 agizüker sama saka la ya Moradabad, Uttar Pradesh nung Guwahati Police temi Deobarnü apu. La ya August 8 nikongdang Delhi nungi Guwahati-i anir aruogo, ta osang ajanga ashi. Osang ajanga ashiba agi la den tetsü, lar tanur ita tenet kinü ka aser la den yariteper ka liasü.
“Tang tashi nung iba bank indang branch nung customer pezü-i FIR agütsüba onoki agizüka lir, iba branch nung deputy manager Olivia Dutta Choudhury ya July 27 nung sama aser la aliba tesem bushiteta Moradabad, UP nung deobarnü apu. La ya ‘transit remand’ Guwahati-i anir arutsü asoshi Noida nung aliba obendanger ka dangi Hombarnü anir ao,” ta Guwahati Commissioner of Police, Hiren Chandra Nath-i ashi.
La samar bushiba mapang Nainital nung aliba resort ka nung tetsür ka Deobarnü ngutet, ta Nath-i ashi. “Saka police ketdangsertem Nainital-i aoba mapang lai iba tesem toktsür orr liasü. Onoki la ya Moradabad nung aliba metet aser ano la iba tesem nungi tangai aotsü merangba mapang apu,” ta Police Commissioner-i ashi. La ya hire asüba gari ka nung la jala, la tetsü aser teyariteper ka densema senzüa liasü, ta ashir.
Iba tetsürlai doctor ka tenüng agi Biraj Jyoti Goswami indang account nungi sen lakh 63 agizük aser customer ka indang account nung sen crore ka aser ano customer ka indang account nungi sen lakh 28 agizük. “Tang tashi nung onok dangi iba ken o nung sendakba FIR pezü arua lir aser parnok indang account nungi iba tetsürlai sen crore 3.70 agizük,” ta Nath-i ashi.
Iba tetsürla ya 2014 küm nungi tenzüka bank nung deposits, schemes aser insurance balala nung nükjidong (target) tongtettsü mechi ozüng alema temelaba magie account nungi sen agizükba aser tanga account-i transfer asüba mapa tem inyaka aru, ta Police Commissioner-i ashi. “Tanem tanemi lai taila account aser lar kinungbo aser jala tenüng nungi sen agizük,” ta Nath-i ashi. La kinungbo Shankar Singa ya kasa bank indang Gangtok branch nung inyaka liasü saka taoba hopta puogo.
July 27 anogo la Guwahati nungi Delhi-i sen lakh 43 bener ao aser sen lakh 10 keter aliba bag ka Guwahati railway station nung baggage X-ray machine ajanga putettsü tsübuba mechi toktsür ao, ta Police Commissioner-i ashi. “Onoki la apudang la ket nung sen lakh 27 dang liasü aser tanüngba sen ya lai agimaogo, ta ashi,” ta Nath-isa shisem.
Tang iba ken o ajanga Guwahati nung bank balala nung taila mapa inyakba putettsü, ta Police Commissioner-i shisem.