Assam nung bendanger anema longkak aittsü

Guwahati, October 23 (Agencies): 1980s mapang nung Assam nung bendangertem anema longkak sashia aitba ama ano khen longkak aittsü atema tamalen Assam nung küm trok tashi bendangertem anema longkak aiter lenirtemi All Assam Students’ Union (Aasu) den longjemogo.
Mapang talangka nungi yongyaa aliba Raij Mel (People’s Convention) senden Honibarnü Guwahati nung kaogo aser iba senden nung Aasu leniba nung bendangertem anema longkak aittsü lemtet.
Aasu chief adviser, Samujjal Bhattacharyya-i, “Ken o jembiba aser longkak aitba na külemi maneni aotsü. Citizenship Act, 1955 ozüngtem yanglushiba ajanga Assam nung liso nüburtem pei state nung tashi makai akumtsü,” ta ashi.
Iba senden nung Citizenship (Amendment) Bill, 2016 anema nokdaktsü lemtet. Tang iba Act ya joint Parliamentary Committee kati reprangshidar. October 25, 2016 nü Parliamentary Committee den o lemteptsü atema Aasu nungi teshimtet telok ka aser liso tentet 27 jaoka lir.
Ajisüaka Centre telemtetba anema state tesem ajaklen longkak aittsü atema People’s Convention nung telemtetba agiogo. Kechi südir süaka amendment bill ji magizüktsü, ta Convention nung bangzünga ayu.
Convention-isa Centre dang, Parliamentary committee dang tribe balala aser lokti tentet balalai pei tebilembatem ashitsü maongka agüjang ta mepishiogo. Iba senden nungsa, kobi melii Guwahati nung longkak sashia aittsü lemtet.
Aasu nung taoba mapang lenirtem aser tang teinyakdak lenirtemi ashiba agi, tang benoka aliba amendment bill ajanga küm trok tashi longkak aitdang nisung 855 asüba sülen Assam Accord tezüngzüktep agiba amajok kümdaktsütsü.
Assam nüburtem kümzüktsü atema temzüng wazüka ayutsü takhangba agüja Aasu-i, Assam Accord nung aliba ama temzüng alema arua alir bendangertem ainshidaktsütsü atema tatemsabuba küm telatetji 1971 asütsüla, ta ashi.
Taoba MP aser bendangertem anema nokdaker lenir, Kumar Deepak Das-i Centre sorkari iba onük sendokba atema BJP-i aniba sorkar aitsüogo.
“Tatembangbuba kümji 1971 asütsü atema Hindu aser Muslim napronglai agizükogo. Iba kümji sorkari yanglushira, state nung ano khen longkak sashia aittsü,” ta Das-i ashi.