Assam nung BJP den kodanga meyariteptsü : AIUDF

Hojai, April 11 (Agencies) : All India United Democratic Fund (AIUDF)-i Assam nung Bharatiya Janata Party (BJP) den melokteptsü ta metetdaktsüogo.
“Onoki Congress aser BJP anema noktaker. Anungji, BJP den yariteptsü tebilemba kecha mali. Ajisüaka, onoki Congress ji secular party ka ta amanger anungji elections tembangba sülen repranga atadi” ta Hombarnü AIUDF tanishir, Badruddin Ajmal-i vote agütsüba sülen osangbener den sensaksemdang ashi.
“Saka onoki Congress dangi indangindanga maotsü kechiyong onoki parnok dak teimla mali” ta Ajmal-isa ashi.
Prime Minister Narendra Modi-i ‘Acche Din’ (Anogo tajungtem) yimyim ayimba tiyazü kechiyong pai 2014 küm Lok Sabha elections nung nangzükba ama meinyak, ta Ajmal-isa ashi.
“Pai ‘Acche Din’ ayimbaji ‘Bure Din’ (anogo tamajungtem) kümogo. Onoki Assam nung tashitait sorkar ka lidaktsünür” ta paisa shisem.
“Iba election ya republic India atema Eid ama lir. Iba ya telok, tamangba yimsü mesüra tangatetba ajak madak lir. Anungji nübortemi vote agütsütsüla. Parnoki vote agütsüba temeten mapa küma inyaktsüla” ta Ajmal-isa metetdaktsü.