Assam nung BJP-i lanurtem mesütsü meranger

Guwahati, January 10 (Agencies) : BJP-i Assam elections atongtsü lia lanurtem ajungmesotsü atema mapa inyaker.
January 19 nü Prime Minister Narendra Modi-i Assam semdangtsü aser lanur party züngsemtem den ajuruteptsü, ta BJP lennir kati ashi.
Swami Vivekananda tasoba anogo bilemteta amungba benjung dak sendakba nung Modi-i Assam nung lanurtem den tebilemba lemsateptsü, ta paisa ashi.
“Assam nung arishi küm 18 nungi 29 tsüngda vote agütsür nisung lakh 50 shi lir. Onok indang alizüngji item lanurtemi assembly election vote agütsüdaktsütsü aser state nung terenlok tasen bener arutsü atema lir” ta BJP lennirsa metetdaktsü.
Modi-i Kokrajhar nung party züngsemtem den ajuruteptsü. Kokrajhar ya Bodoland Territorial Council (BTC) administration kübok Bodo nunger alidak tiyongtsü lir.
Kokrajhar nung senden alibaji kanga tongtipang kechiyong BJP aser Bodoland People’s Front (BPF) na tesentaktep ayutsü atema jembishinür ta angazüker.
Kokrajhar semdangba mapang Modi-i BTC nem teyari agütsütsü indang osang sangoktsütsü imlar.
“Guwahati nung Modi-i Yuva Sanmelan nung adentsü aser iba nung Assam kübok tesem balala nungi lanur lakh 1 tema adentsü imlar” ta BJP lennirisa metetdaktsü.