Assam nung BJP-i takok ngura, arrtsü adena ozü ka danga mesüidaktsütsü

Guwahati, April 5 (Agencies) : Mongulbarnü BJP tir Amit Shah-i Assam Assembly elections tanabuba shilem atema nüboyimba mapang Congress telok aser parnok tir Sonia Gandhi aitsü.
Election tanabuba shilemji taruba Hombarnü Lower Assam nung agitsü lir aser Amit Shah-i Bangladesh nunger onük nung ameter Congress-i aniba Tarun Gogoi’er sorkar aitsü.
Assam nung Congress sorkari arrtsü lapoktsü aser vote angudak ama amshitsü atema ozüng alema arurtem aniok, ta pai ashi.
“Pei linük toktsür arurtemi Assam nunger lanurtem indang mapatem rakzükogo. Tarun Gogoi mesüra Congress-i dang aginü asübo, parnoki tesüiba küm 50 tashi yimsü süa arudang ozüng alema nisungtem aruba noktangteter lila. Centre nung Modi’er sorkar lir aser Assam nung BJP sorkar ka tentetra, arrtsü adena ozü dena yima mesüitettsüsa noktangtsü” ta BJP tir-i metetdaktsü.
Congress tir Sonia-i Assam nung nüboyimba mapang Prime Minister Narendra Modi dang par sorkar küm ana nung mapa inyaktetba asüngdangba atema Shah-i la aitsü.
“Soniaji, iba ya Lok Sabha elections masü saka Assam indang Assembly election lir. 2019 nung onoki LS election atema arudang onoki inyaktetba osang ajak metetdaktsütsü” ta pai ashi.