Assam nung BJP-i, WB nung TMC-i takok angutsü: Exit Polls

New Delhi/Guwahati, May 16 (Agencies): State pongu nung assembly election tembangba sülen tanü exit poll osang sangdongogo; exit poll osang balala ajanga Assam nung BJP-i takok angutsü aser West Bengal nung TMC-i takok angutsü ta shiogo.
BJP-i Assam nung takok tulu angutsü, aser ibaji party-i tang mezüng Northeast state nung takok anguba asütsü, ta exit poll osang ajanga ashi.
Exit polls balala ajanga BJP aser par telokteptemi menden 126 nungi menden 73 angutsü aser Chief Minister Tarun Gogoi-i aniba Congress-i menden 37 dang angutsü, ta ashi.
Assam nung Gogoi-i pezübenren yimsüsütsü nükjidong nung toktepogo. Election matongdang taoba Congress lenir Himanta Biswa Sarma-i BJP nung aden. BJP-i takok ngura Chief Minister ji tang Union minister teinyaktak Sarbananda Sonowal asütsüa akok.
Yimtenren metetertemi ashiba agi, Assam nung Congress-i teloktep party mebushibaji aibelen tulu ka liasü.
Congress lenir Mani Shankar Aiyar-i, “Bihar nung ama onoki inyaktsüla asü aser yangi-a BJP anemba Front ka tentettsü asü,” ta tesasaba olen ka jembiogo.
West Bengal nung Chief minister, Mamata Banerjee’er party Trinamool Congress-i menden 196 tashi nung takok angutsü aser Left-Congress teloktepi 92 aser BJP-i menden 3 angutsü akok, ta shiogo.
Maneni ABP Ananda-i, Trinamool-i menden 178, Left-Congress telopktepi menden 110 aser BJP-i menden ka dang angutsüa akok, ta ashi.
Exit poll balala ajanga assembly menden 140 aliba Kerala nung Left party-i menden 79 angutsü aser Congress-i aniba UDF telokptepi menden 57 aser BJP-i menden 3 angutsü, ta shiogo.
Tamil Nadu nung Chief Minister J Jayalalithaa-i angbo menden ajemer 103 dang angustsü aser DMK-Congress teloktepi menden 120 angutsü ta poll balala meyokteper asangdangba ajanga sayur. Iba teloktep nung lenirji arishi küm 93 M Karunanidhi lir aser pai Chief Minister inyaktsü tebilemba lir, ta jembiogo.
Ano union territory, Puducherry nung Congress-i DMK den lokteper takok angutsü.
Tanü exit poll osang sangdongba sülen nikongdang osangbenertem den jembidang Assam Chief Minister, Tarun Gogoi-i, state nung Congress sorkari inyakba mapa tajungji nüburtemi meteta lir, ta ashi.
“Ozü Assam nüburtem dang ni temulung kanga alemer. Onoki temeleshi koba tashika bener arutsü’ar ibaji Assam nüburtemi meteta lir,”ta ashi.
“BJP-i Assam dang tenangzüba agiba ajak langkushishi aküm. BJP-i shisaliok nung dena RSS benokbaji linük atema lendong,” ta paisa ashi.