Assam nung BJP kodamasüba tensa ka nung lir

Guwahati, March 09 (Agencies): Assam nung assembly election agitsü mapang ana nung lia, Bangladesh nungi ozüng alema aitba onük aser state nung Assam nübur maitsü na tsüngda BJP-i liromedemtsü kanga merangdar, kechiyong 2014 küm Lok Sabha election mapang BJP Ato kilonser candidate, Narendra Modi-i party sorkar tashii arura ozüng alema state telungi aita alir Bangladesh nunger meinzüka yoktsü nangzüka liasü.
Ajisüaka yaküm Ato kilonser Modi’er sorkari, pei tamangba yimsü ajanga reshikangshi tia nung alir Bangladesh nungi Hindu nungertem nem tejenoktak agütsütsü atema ozüng ka yanglu.
Taruba Assam assembly election nung BJP atema bendangertem state telungi ozüng alema aitba ya tebilemtsü onük ka asütsü.
BJP-i, taruba state election ya Bangladesh nungi ozüng alema aitertem dang nungi Assam nunger maitsü kümzütsü atema ‘Saraighat rara’ lir, ta sangdongogo.
BJP otongdar, Hitendra Nath Goswami-i, “Item onük nung onok tangatetbaji tejangja. Bangladesh nungi ozüng alema aitertemi International arrtsülen tapok ajanga maongka agir aser iba nungji BJP-i atsü atsütsü. Ajisüaka Hindu nunger reshikangshi tia nung alir nem senso agütsübaji meimchirtem temeim mapa nung ajemdaker inyaker,” ta ashi.
Modi sorkari Bangladesh nungi aruba Hindu nunger nem senso agütsütsü mera agiba atema All Assam Students’ Union (AASU) densema state nung lokti tentet aikati lungkak aitogo.
Taruba Assam election nung, Bangladesh nungi ozüng alema aitertem nokdangtsü onük aser Bangladesh nung reshikangshi tia nung alir Hindu nunger nem senso agütsüba onük nung BJP kanga mejeptsü.