Assam nung BJP züngsem anati sorkar mapa toktsü

Guwahati, Rongchii 27 (Agencies): Sarbananda Sonowal-i aniba council of ministers nung menden melemzüktsüba sülen BJP MLA anati yangtepnü government posts toktsüogo.
Dibrugarh MLA Prasanta Phukan-i governing body of Assam Medical College and Hospital mendenbuba menden aser panchayat election atema tentetba state policy-making committee mendenbuba menden toktsüogo. Kasa mapang nung Cachar district, Sonai MLA Aminul Haque Laskar-i Haj Committee tatongtir menden toktsüogo. Muslim kin nungi MLA pa kija lir aser par lokti nungi cabinet menden ka danga matatsüba atema pai iba mapa toktsü.
Phukan-i osang bener dang ashiba agi, “ni ozü part aser nübur atema inyaker. Ni menden aika aliba assembly ka nung asünungbo minister menden atar lila. Ni iba menden angutsü asoshi metemsü aser iba ajanga meshim.”
Kasa mapang nung pai minister tasen shimertem nem tenüngsang agütsüogo.
“Panchayat election matong tsüngda ni iba amala khuret mebener, saka ni party aser nüburtem ajangzüktsü asoshi maneni inyaktsü,” ta Phukan-i ashi.
Kasa mapang nung Laskar-i minister tem tenangzüktepba agiba sülen osangbener dang ashiba agi, Muslim nunger rongnungi MLA pa kija dang lir aser minister meden atatsü asoshi pai imlaa liasü. Paisa ashiba agi, nüjiso anguba sülen tang mezüngbuba cabinet menden nung Muslim nunger ka danga mali.
Ajisüaka Laksar-i ashiba agi, chief minister-i ministry atema nisung tapet shimogo aser pai par constituency terenlok asoshi maneni inyaktsü. Paisa pa tenangzükba sentong nung mejaokba agi maden, ta ashi. Phukan-a iba sentong nung maden.
Laskar ya BJP nung 2011 küm aden aser iba mapang nung Union minister Nitin Gadkari national tir liasü. Pa All Assam Students’ Union züngsem ka liasü aser AGP nung 1995 küm aden. Laskar-i 2016 küm Sonai constituency nungi election akok kong voter 1,58,000 aliba nungi 98,000 Muslim nunger lir.
Pai ashiba agi, pa pusemertem mepelar aser Sonai mondal BJP Minority Morcha tir Hamidul Islam-i anir mapa nungi anen tenzükogo. Pai parnok dang atasaa alitsü asoshi shiogo.
Maneni Morigaon district nunga MLA Rama Kanta Dewri nema minister menden magütsüba atema lokti tentet 10-i longkak aita liasü.