Assam nung Bodo telungpur 2 kahset

Guwahati, February 14 (Agencies) : Assam nung Adivasi aser Hindi oshi jembirtem teseptba aser tashiyimi pur aoba atema aija alir Bodo nunger telungpur ana Deoabrnü kahset.
Kokrajhar district kübok Auzarguri tesem nung sepaitemi tenaji kahset, ta police osang ajanga metetdaktsü.
Bodoland Territorial Area Districts (BTAD) nung mapa lemzüka inyaker sepaitemi National Democratic Front of Bodoland (NDFB) telungpur anaji kahset.
Police-isa ashiba agi, tenaji Sanjib Basumatary (Khardes) aser Jangswrang Basumatary (Ladai) na ta jangjaogo.
December 2014 nung Adivasi nunger tepsetba aser kasa küm January ita nung Hindi oshi jembirtem pur aoba tatalokba atema National Investigation Agency (NIA)-i Ladai aputsü bushitepa aru.
Ano, Khardes jia ozüng alema mapa inyakba ken o aika nung tai tonglokja aputsü bushitepyonga aru, ta police-isa ashi.
Deobarnep Indian Army aser Assam Police külem telok kati telungpurtem den chitepa ajurutep.
Iba mapang telungpurtemi sepaitem dak injang kahloktsü aser iba sülen parnok kahetpdang telungpur anaji injang agi yirutsü.
Tenaprongla Dotma nung aliba mozüki kati anir ao saka len tom nung süadok.
Tena ket nungi 7.65 mm pistol ana, injang aser grenade kar ngutetogo, ta police-isa ashi.
Tawa ti police aser army telok kati NDFB züngsem ka kahset. December 2014 nung telungpurtemi Chirang district nung nisung aika tepsetba ken o nung iba nisung ya aija NIA-i aputsü bushitepa aru.