Assam nung Bodoland state kümtettsü atema takhangba agütsür

Kokrajhar, November 26 (Agencies): Mongulbarnü Assam kübok Kokrajhar nung ABSU, NDFB (P) aser People’s Joint Action Committee of Bodoland Movement (PJACBM) teloktemi Bodoland balaka kümtettsü atema takhangba agüja lungkak aitogo.
Iba sentong nung nisung meyirjang aika adenshia Bodoland atema takhangba agüja shilem agi.
Centre-i mapa meinyakba ajanga state tasen meshiba movement groups-i lungkak aitba sentong balala agiba ya tesasatsüka lir, ta taoba Rajya Sabha MP Urkhao Gwra Brahma-i ashi.
Sorkari nangzükba ama inyaktsüla. India sorkari state tasentem kümtettsü asoshi asaa mapa meinyaker. Centre aser state sorkatemi nangzükba ama inyaktsüla, ta Brahma-isa ashi.
Bodoland state balaka kümtettsü asoshi takhangba agütsüba ya tang tasen masü. Bodo nungeri küm aika iba takhangba agüja arur. BJP-i parnok sorkar akümba sülen Bodoland khuret koktettsü ta nangzük saka tang parnoki ibaji amadokogo, ta paisa shisem.
PJACBM chief convenor Rakesh Boro-ia ashiba agi sorkari mapa meinyak tashi onoki state tasen kümtettsü atema takhangba agüja mapa inyaktsü.
Laddakh aser J&K union territory tem aser Telengana state kümtet saka kechiba Centre-i kasa tangatetba nung Bodoland mekümteter? ta paisa asüngdang.