Assam nung bomb yutsüba atema police-i school tanur 2 apu

Guwahati, August 17 (Agencies) : Bodbarnü Assam police-i Tinsukia district nung school tanur ana apu. Independence Day nü Tinsukia aser Charaideo district tem nung bomb pokdaktsüba nung shilem agiba atema school kaketshir anaji apu, ta police-i metetdaktsü.
“Kakoraj Higher Secondary School nung Class IX aser Class X kaketshir ka ka nem ULFA züngsem pezüi bomb rema yutsütsü mapa lemzüktsü” ta Tinsukia Superintendent of Police (SP), Mugdhajyoti Mahanta-i ashi.
“Yimjung olemtep nung madenba ULFA züngsem pezüji AK rifles bener aru aser kaketshir ana dang parnoki shimteta aliba tesemtem nung bomb yutsüra sen agütsütsü ta mesüzük. Bomb temji August 15 nü apoktsü atema mapang renema lir ta parnoki ashi” ta SP-isa shisem.
Ajisüaka, ULFA telungpurtem jagi tanur ana nem sen magütsü, ta paisa metetdaktsü.
“August 11 nü school tanur ana kidang nungi apuso aser Tinsukia o Charaideo district tem nung bomb tem rema yutsü. Onoki osang tejangja kar angazükba sülen tena puogo aser tenatia nangzükogo” ta Mugdhajyoti Mahanta-isa osangbener dang ashi.
“ULFA züngsem mali akümer aser iba jagi parnoki civilian tem amshir” ta paisa shisem.
August 12, 2016 nü ULFA telungpurtemi Tinsukia district kübok Philobari tesem nung civilian dak injang kahloktsüdang nisung ana kahset aser tenet yirutsü.
Yimjung olemtep nung madenba ULFA aser tanga telungpur teloktemi Independence Day mokdangtsü tayongzükba agüja liasü.