Assam nung CAA anema lungkak aitba manener

Udalguri/Mangaldai, January 12 (Agencies): All Assam Students’ Union (AASU) den lisopur telok 28-i Udalguri district kübok Tangla jila nung Citizenship Amendment Act (CAA) anema lungkak ait.
Honibar nikongtsütsü nisung 10,000 tema adenshi aser Tangla HS playground nungi tenzüker Kukurakata tashi yimdong süa jaja.
Iba sentong ya Tangla Anchalik AASU-i ayongzük aser president Pranjal Deka, assistant AASU general secretary Jayanta Kumar Bhattacharjya aser tangartemi o jembi.
“Gazette notification ka ajanga iba Act mapa tenzükba ya otsüsütsü aketba Assam Accord mezüngmeshiba mapa ka lir” ta Bhattacharya-i ashi.
“Onoki iba Act magizüker aser kechi ajurudir ajuruaka magizüktsü. Iba ya Assam kümzüka ayutsü atema lir, kechiyong Bangladesh nungi nisung aika arua aliba ajanga timtem ajurua lir” ta Pranjal Deka-ia ashi.
Honibar aonung Mangaldai nung AASU indang Inter Mangaldai Unit-ia torchlight rally ka ayonga agidang nisung aikati shilem agi.
Maneni, Asom Jatiyatabadi Yub Chatra Parishad (AJYCP) Darrang unit züngsemtemi Prime Minister Narendra Modi aser Union home minister Amit Shah na mesüka yanglur rongdok.