Assam nung citizen bill ken o angadangtsü

Hailakandi, Monupii (May) 4 (Agencies): Citizenship (Amendment) Bill, 2016 dak sendakba nung ken o Barak Valley nung Monupii 8 aser 9 nü angadangtsü.
Citizenship Act, 1955 amend aütsüba atema Joint Parliamentary Committee shimteta aliba mendenbuba Meerut MP Rajendra Agrawal lenisüba kübok committee züngsemtemi valley semdanga tezüluba nung takhangbatem bendenba den külemi nüburtem, NGO, lokti tentetbalalatem tebilemba angadangtsü, ta Cachar deputy commissioner S. Lakshmanan-i ashi.
Silchar nung National Institute of Technology, conference hall nung Joint Parliamentary Committee züngsemtemi Monupii (May) 8 nü 2:30 nung 5:30 tashi aser Monupii (May) 9 nü 9:00 ako nungi terotu tashi ken o angadangtsü. Lakshmanan-i iba sentong nung adentsü asoshi jangraba purtemi Barak Valley kübok Cachar, Karimganj aser Hailakandi districts deputy commissioner offices mashi ka den parnok shilem agitsüba osang agütsütsü mepeishi asüngdangogo. Pai nüburtem dang yimya tajungtiba nung Committee züngsemtem dang parnok tebilemdangba shidangtsü asoshi mepeshia asüngdang.
Iba telok yagi Guwahati aser Shillong dena semdangtsü.
Iba bill anema tongti süa nokdakba telok, Krishak Mukti Sangram Samiti puri state nung aliba lokti tentet ajak dang JPC nem iba bill anemba metetdakja tezüluba nung takhangba agütsütsü asoshi mepeshia asüngdangogo. Iba bill pass süra Assam nung lisopurtem atema tali mejungi akümtsü kechiyong nung Assam nung Bangladesh nungi Hindu nunger arua alirtem crore 1.9 nem lisopur jenjang agütsütsü.
Nisung semer agi kümtetba committee ya 2016 Luroi (Aug) 11 nü iba bill asadangtsü asoshi tentet.Iba committee ajanga Citizenship Act, 1955 amend asütsüba asadangtsü aser osang ka agütsütsü. Iba telok nung Assam nung MP asem; Bhubaneswar Kalita, Ramen Deka, Sushmita Dev aser Kamakhya Prasad Tasa dena lir.