Assam nung Citizenship Bill anema lungkak aitshir

Lakhimpur, November 15 (Agencies): Assam nung nisungtemi maneni Citizenship (Amendment) Bill anema yimdong nung lungkak aittsü tenzükogo.
Hokolbarnü Asom Jatiyatabadi Yuva Chatra Parichad (AJYCP) lenisüba kübok nisung aikati North Lakhimpur nung CAB agienang ta takhangba agüja lungkak ait.
November 18 nungi Parliament indang winter session agidang Centre-i Citizenship (Amendment) Bill tasen kümshir benoktsü ama bilemer.
Tanü North Lakhimpur kübok Tyagkshetra tesem nung nisungtem adenshi aser yimdong sema lungkak aita jajar Deputy commissioner indang office jakdang sentongji tembang.
AJYCP lennirtemi Lakhimpur deputy commissioner ajanga Prime Minister Narendra Modi dangi shidi ka züluba nung CAB agienang ta takhangba agüja lir.
“Onoki kodanga CAB magizüktsü. Iba ya democracy aser Assam indang oshi, sobaliba aser litsü alema lir” ta AJYCP lennirtem Mandeep Neog aser Jyoti Das nati shidi nung shia lir.
Iba Bill ya taküm January ita Lok Sabha nungbo agizük saka Northeast nung bill anema lungkak aitba aser opposition tongti Congress-i anema noktakba ajanga Rajya Sabha nungbo mebenoktet.
Home minister Amit Shah-i “National Register of Citizens mapa metenzükdang tamasa CAB benoka agizüktsü” ta osang metetdakja lir.