Assam nung Congress-i meloktepi tokteptsü: Gogoi

Guwahati, January 20 (Agencies): Tanü Congress lenir aser Assam Chief minister, Tarun Gogoi-i, taruba Assam assembly election nung Congress-i tanga party tem meloktepi tokteptsü, ta shiogo.
State nung tan agi asembubaren chief minister inyaksang Tarun Gogoi-i, Assam assembly election nung Congress-i tanga party den meloktepi toktepner, ta ashi.
NDTV osangbener den jembidang Gogoi-i, “Election matongdang tanga party den lokteptsü menüngdaker,” ta ashi.
“Onoki tangatetba ka nung inyakner aser ibaji- onoki vote agütsütsüpurtem dang Congress nem vote agüjang mesüra BJP aser par teloktep tamakok ngudaktsütettsüpur party nem vote agüjang ta mepishitsü,” ta paisa ashi.
Yaküm November ita Bihar assembly election nung Congress densema aliba teloktep, Grand Alliance-i takok tulu anguba sülen pai tama, Bihar ama tanga state tem nunga BJP anemba party tem longjemer tokteptsüla ta jembia liasü.
Taküm April ita Assam nung assembly election agitsü aser iba election nung Congress, AIDUF aser AGP party tem longjemer tokteptsü südi ta bilema liasü, ajisüaka tanü Gogoi-i item o jembiogo.
Tan election nunga Congress chief minister candidate ji Tarun Gogoi sa asütsü.