Assam nung Congress party-i Amit Shah olen aitsü

Guwahati, Yimpoksüi/November 21 (Agencies): Union Home Minister Amit Shah-i National Register of Citizens (NRC) update asüba inyakyim ya Assam nunga India nung tanungba state tem den külemi agitsü ta ashiba olen ya tamangba yimsü dak ajemdaker lokti lemsatsütsü merangba onük ka lir ta shia Assam nung opposition party Congress puri aitsüogo.
“Supreme Court tawabangba kübok Assam nung NRC sangdongba sülen ita asema mao, koba SC-isa agizükogo. Anungji Amit Shah-i Assam nung NRC tanaben update süshitsü jembiba ajanga Modi sorkari SC-i telemtetba agiba magizükteter ta angateter,” ta Assam legislative Assembly nung Opposition lenir Debabrata Saikia-i ashi.
Paisa, Assam nung NRC inyakyim nung state sorkar kübok inyaker 50,000 dak tema anioka inyak aser saru agütsür sen crore 1200 indokogo. Assam nung aliba nütsüngyongsük crore 3.29 shi iba inyakyim ajanga kanga timtem agütsüogo, ta ashi.
“Nisung karibo parnok lisopur ta kuli tejangja agütsütsü mechi parnok kiojen aser kiset shiruru yoka inyakogo. Kasa mapang nung nisung aika NRC tatembangbuba sangdong angatsü asoshi km 600 tashi senzüa mejangjaba tesemi ogo.
Paisa Modi sorkar aija ashiba agi, “Modi sorkari mezüngbuba nung NRC update asüba inyakyim ya Supreme Court medeni inyaknü, ajita asünungdang tamangba yimsü tsütsü nübu ajema aliba chichiba lisopurtem kar indoktsü aser linguistic minority lokti nungi ozüng alema bendanger arua alirtem kar NRC nung inoktettsü.”
“Tanabuba nung BJP-i tamangba yimsü dak ajemdaker parnok onük benoka inyaktsü atema NRC ken o tembanga minyakdaktsünü,” ta paisa ashi.
“Tasembuba nung Supreme Court-i Ram Janambhumi mangatettep ken o bentettsüogo saka BJP-i linük ajunga nung NRC ya political tsütsü telamdang adokdaktsütsü asoshi hadir tasen ka ama amshiner,” ta pai ashi.
Saikia-i Supreme Court dang Assam nung NRC inyakyim tanaben benoka inyaktsü atema Modi sorkar nem temelaba magütsütsü asoshi mepeshia asüngdangogo.
Ajita mesera lisopur jenjang agütsütsü atema Assam nung aliba nüburtem nem tanaben timtem agütsütsü.
Paisa, Suprem Court-i taoba küm trok tsüngda iba inyakyim ajanga Assam nung terenlok maparen aika minyakteti aliba asadangtsüla, ta ashi.