Assam nung Congress Tir inyaktsü atema Ripun Bora shim

New Delhi, August 23 (Agencies) : Assam assembly election nung tamakok anguba sülen Congress-i par telok tiptemtsü atema Ripun Bora Assam nung Congress Tir inyaktsü shimogo.
Taoba Congress Tir, Anjan Dutta mapang tatsüka temang manemi aruba sülen asü aser pai toktsüba menden Ripun Bora-i melenzüktsü.
Bora ya Rajya Sabha züngsem ka lir aser Assam nung Congress-i küm 15 tashi sorkar yimsü süa arur BJP tsüngdang tamakok anguba sülen pa Tir inyaktsü shimogo.
Ripun Bora ji Party tir, Sonia Gandhi-i shim ta AICC General Secretary Janardan Dwivedi-i metetdaktsü.
Bora ya taoba mapang sorkar ketdangtser ka liasü aser pa Sonitpur district nungi lir. Pa ya taoba Chief Minister Tarun Gogoi den tesentaktep tajung aliba lennir ka lir.
Küm 8 tejaklen CBI-i süpokrem ken o ka nung aija Bora apuba sülen Gogoi-i Education Minister menden nungi Bora atsüngdok.
CBI-i nisung tepsetba ken o ka bushisüngdangba nunga Bora dak tai tonglokja liasü saka Guwahati court kati Bora aitsüba onüktem agiena liasü.