Assam nung COVID-19 agi shiranger 27 taneptsü nguogo

Guwahati, April 26 (Agencies): Assam nung COVID-19 agi shiranger nisung 8 taneptsü ngur mozü ki balala nungi tanü anizükogo.
Tang tashi nung Assam nung COVID19 agi shiranger 27 tashi taneptsü nguogo. Assam nung COVID19 agi shiranger ajak agi nisung 35 liasü. Parnok rongnungi nisung ka süogo.
Tang Assam nung COVID19 agi shiranger nisung 7 dang kümogo.
“COVID19 agi shiranger nisung 8 indang sample asemben-pezüben tashi tendangdang negative ta putet aser iba atema parnok mozü ki balala nungi anizükogo” ta Deobarnü Assam health minister Himanta Biswa Sarma-i metetdaktsü.
Ajisüaka, mozü kidang nungi oaka parnok health department-i taruba anogo 14 tashi reprangtsü, ta paisa ashi.
Deobarnü Golaghat nungi COVID19 agi shiranger nisung pezü Kushal Konwar Civil Hospital nungi anizük. Ano, Dhubri nungi shiranger asem Mahendra Mohan Choudhury Hospital (MMCH), Guwahati nungi anizük.
Nalbari nungi COVID19 agi shiranger ka MMCH, Guwahati nungisa anizük.
“COVID19 agi shiranger nisung 8 taneptsü anguba ajanga tang state nung COVID19 alir nisung 7 dang kümogo” ta tanü National Health Mission, Guwahati office nung Sarma-i osangbener dang ashi.
Tanü tashi nung nisung aika taneptsü ngur anizükaka, Assam nung mezüng COVID19 putetsang Jamal Uddin tang tashi anepaludar, ta paisa ashi.
“Pa Silchar Medical College Hospital nung anepalur aser pa indang sample nung positive dang puteter” ta Minister Sarma-isa shisem.