Assam nung excise ketdangser asem gari lendong nung asü

Guwahati, Rongjui/September 26 (Agencies): Assam kübok Golaghat district nung Bodhbar aonung gari tsüktepba lendong ka nung nisung asem asü aser asem kanga mejungi yiru.
Iba lendong ya Numaligarh anasa Morangi tesem nung National Highway 39 nung atalok.
Lendong nung asür asemprongla ya excise inspector liasü.
Excise ketdangsertem mena aliba Tata Sumo aser dumper ka tsüktepba sülen iba lendong ya atalok.
Excise Intelligence Bureau nungi parnok trok ya tongtibang mapa ka atema Jorhat leni oya aliba mapang iba lendong ajuru.
Gari ana kanga mejungi tsüktepba sülen Sumo nung mi jangru aser mitsü küma rongtok.
Excise inspector Sumu Maibangsa aser Ramen Bonjang na taküm lia gari telung nung rongset.
Maneni excise department nungisa Harekrishna Kumar Jorhat Medical College Hospital nung asü.
Yirur alir ketdangser asem ya Sundar Bari, Tanu Injal aser Zahidul Haque ta jangjaogo. Parnok asemprongla tang Golaghat civil hospital nung temang anepaludar aser osang ajanga ashiba agi parnok asemprongla temang tajungba lir.
Kasa mapang nung dumper anisang aser handyman na lendong atalokba sülen jena oadaok.
Excise department nungi intelligence officers tem ayaterem nung lendong ataloka asüba dak temulung melemi bilemer.
Assam excise minister Parimal Suklabaidya-i iba lendong osang angazüka aoksaba lemsatepba den department dang asür kibong tem nem teyari agütsütsü shiogo.
Paisa, yirur alirtem mozüki nung temang anepaluba taa ajak state sorkari aotsü ta shiogo.
Minister-isa yirur alirtem nem treatment tajungtiba agütsütsü atema Guwahati Medical College and Hospital nung tongti ketdangsertem den sensaksemogo.
Paisa, Kamrup excise inspector dang inyakyim ajak anepalutsü atema tetuyuba agütsüogo.
Kasa mapang nung Assam chief minister Sarbananda Sonowal-i Upper Assam divisional commissioner Jurie Sonowal iba ken o asadangtsü atema tuyuogo.
Maneni additional excise commissioner Sanjiv Medhi-i anir department nungi telok ka Sumu Maibangsa den asüpila sentong nung oa adentsü, koba Diphu nung agitsü.