Assam nung facebook post ka ajanga raratep; 15 yiru

Diburgarh, Rongjui (September) 14 (Agencies): Assam kübok Tinsukia district nung ashihitep aketba Facebook post ka ajanga telok ana tsüngda kanga mejungi raratepdang nisung 15 shi ka yiru.
Iba tatalokba ya Doomdooma kübok Borhapjan tesem nung atalok aser police-i tenük amdaktsüba tapoktsü aser süng amshia tensaji azüokteta liasü.
Iba lendong sülen Tinsukia deputy commissioner Oinam Saran Kumar Singh-i Doomdooma, Longswal aser Borhapjan tesemtem nung section 144 kübok tenokdangbatem agütsüogo.
Doomdooma town kübok Dr Rajendra Prasad Road nung aliba telok ana tsüngda yashi nikongtsütsü obang meputep adoka raratep. Ajisüaka, taintem tiyongi aiba sülen ken o ji angatettep.
Social media nung parnok tsüngrem mezüngmeshiba atema Hokolbar anepdang 9:00 ako meta telok kati Doomdooma nungi Borhapjan tashi lungkak aitba sentong ka agi.
Parnoki aibelener aputsü atema takhangba agüja Borhapjan old market süidang tanga telok nungi züngsem kari parnok amak. Iba jagi telok ana tsüngda rara tulu adok.
Lendong atalokdang police aser CRPF tem tesem tonga aru aser tenük amdaktsüba tapoktsü pokdaktsüba den süng agi züka telokji senshidaktsü.
Tang iba tesem nung tensa mejungi lir.