Assam nung film yanglur kati ULFA(I) teyari meshi

Guwahati, January 25 (Agencies): Assam nung film yanglur kati ULFA(I) pur dang shidi ka ajanga ULFA(I) telok dak ajemdaker yangluba pa indang film Assam nung film sayudak tesemtem nung sayutsü asoshi teyari meshia züluba ken o dak sendakba osangtem reprangshitsü, ta police-i tanü ashi.
‘Shakira Aahibo Bokultolor Bihuloi’ film ya January 20 nü sayaogo. Shah Rukh adokba film ‘Raees’ aser ‘Kaabil’ koba nung Hrithik Roshan tongti shilem agir, item film tem sayutsü asoshi film sayuba tesemtem nung kiburtemi iba film agientsü telemtetba agiba sülen director, Himangshu Prasad Das-i iba shidi zülu.
“Onoki iba ken o osangtem ajanga angashiogo. Ozüngi melaba ama onoki inyaktsü,” ta Assam Director General of Police, Mukesh Sahay-i osangbenertem dang ashi.
Das ya National School of Drama nung zünga aliba nisung ka lir. Pai facebook nung odiodia iba shidi ULFA(I) lenir Paresh Barua dangi pa indang mezüng film Assam nung film sayuba tesemtem nung sayudaktsütsü asoshi teyari meshia zülu.
“Asenok Assamese nunger ama melitetra, nüjiso ngur külen asen maitsü kechi akümtsü,” ta pai shidi nung shia lir.
Iba sülen Barua-i local TV channel aser film sayuba tesemtem dang iba film nüburtemi ajinüra sayutsü asoshi ashi, aji oda mesüra ULFA(I)-i iba anema nokdaktsü, ta shisem.
“Shingaia onok den tang tashi nung kecha tongtepratepa mali, saka film sayuba tesemtem kümzüka ayutsü asoshi tanükertem agütsütsü onok renemdar,” ta Sahay-i ashi.
“Temzüng ozüng dak sendakba nung timtem kar danga adokra Das-i iba khu abentsü. Onoki temerenshi tesashi agütsütsü,” ta Guwahati Police Commissioner, Hiren Chandra Nath-i ashi.
Film ka sayutsübaji film yanglur aser tesayur na tsüngda shishilembaba maparen ka lir, ta Nath-i ashi.
“Iba ya telok ana tsüngda shishilembaba maparen ka lir. Kechiba lokti ajak iba ken o nung nüngdak makai shilem agitsü,” ta police-i Das anema kecha temerenshi agütsütsü magütsütsü asüngdangdang pai langzü.