Assam nung Garo autonomous council tentettsü akhanger

Gaolpara, Mongputeni (October) 19 (Agencies): United Garo Autonomous Council Movement Committee (UGACMC)-i Prime Minister Narendra Modi dangi online memorandum ka agütsüba nung Assam nung aliba Garo nunger nem autonomous council agüjang ta takhangba agütsü.
UGACMC tir Alex K. Sangma aser tezülur Thengsil Sangma nati sign asüba memorandum nung India linük temzüng kübok Garo nungertem atema autonomous council ka tentettsü shia lir.
“Assam nung Bodo nunger sülenbo nütsüng yongsük teimba aliba kinji Garo nunger lir aser Rabha Hasong Autonomous Council (RHAC) nungbo Rabha madak kin tulutiba lir. Anungji Assam nung Garo Autonomous Council ka tentetba ajanga dang Garo nunger taginüba atongtsü” ta UGACMC-isa metetdaktsü.
Sorkari Garo nunger senzüka yutsür aser Garo nunger atema mapa balaka meinyaktsü, ta parnokisa shisem.
Autonomous council ka tentetba agi dang Garo nunger taginüba tongtettsü. Tesüiba kümtem Assam nung Garo nütsüng yongsük aser Garo yimtsüngtem den tajemba alir nem autonomous council tem tentettsüogo. State sorkari RHAC, LAC, MAC, Thengal Kachari Hill Council, Sonowal Kachari Council aser Deori Council tentettsü. Garo nunger dak alaka Assam nung kin ajak nem autonomous council agütsüogo, ta parnokisa ashi.
UGACMC-i Meghalaya chief minister Conrad K Sangma den ajurutep aser paia parnok takhangba pusema nungiter ta metetdaktsü.