Assam nung hung Assembly atema kari meranger: Modi

Raha (Assam), April 08 (Agencies): Hokolbarnü Ato kilonser, Narendra Modi-i telemsa adokdaktsür kari Assam nung ‘hung Assembly’ atema merangdar, ta ashiba den külemi nüburtem dang ibaji matalokdaktsütsüla, ta mepishi.
Tanü Raha, Assam nung assembly election atema BJP nüboyim sentong ka nung jembidang Modi-i, “Assam nung majority malitsü atema telemsa adokdaktsür tashi kari meranger. State nung hung assembly malitsü atema ni nüburtem dang mepishir,” ta ashi.
“Tesülen nungi yimsüsüba malitsü aser sorkar tasenbaji remote-control ajanga manishitsü atema inyaktsü ni nenok dang mepishir,” ta ashi.
“Assam nung nenoki takok tulu ngudakja sorkar ka shimtsüla. Shilem tanabuba election atema anogo asem dang anünga lia tiyazü aser olulu proktsü merangtsü, ajisüaka kibong shi tua sentong tamajung raksatsütsüji nenok mapa lir,” ta pai ashi.
“State nung BJP-AGP-BPF teloktepi sorkar tasen akümtsüji shingaia menokdangtettsü. Tenangzükba sentong nung adentsü aser Assam nüburtem den tepela lemsateptsü atema ni ano arutsü,” ta paisa shisem.
Pai ashiba agi, BJP-i yimsüsüba state ajak nung sensak tia jenjangji kanga ajemer, ajisüaka Assam nungbo sensak tia mejungi lir, aser ibaji küm 15 yimsüsüba Congress sorkar tai ajanga lir.
“Centre sorkari Dima Hasao Autonomous Council atema sen crore 200 aser Karbi Anglong Autonomous Council atema sen crore 375 lemzüktsüogo, iba den külemi sen crore 40 den crore 16 bo agütsüogo, ajisüaka item sen amshitsü atema tang tashi sorkari schemes agüja mali,” ta paisa metetdaktsü.