Assam nung ILP mebenoktettsü: Himanta Sarma

Guwahati, March 2 (Agencies): Assam finance minister Himanta Biswa Sarma-i Deobarnü ashiba agi, Assam nung ILP mebenoktettsü.
“Assam ya Northeast asoshi kikümdong lir, anungji inner line permit (ILP) inyakyim ya Assam nung benoka meinyaktettsü,” ta Sarma-i Deobarnü Guwahati nung osangbenertem dang ashi.
Assam Accord, Clause 6 high-level committee-i sorkar nem parnok indang report agütsüba nung Assam nung ILP benoktsü asoshi benokogo ta osang prokshir jembitepba mapang ka nung pai iba olen ya shiogo
“Asenoki Assam nung ILP benokra state nung unemployment asemsü agi timba akümtsü,” ta Sarma-isa ashi.
“Bendangertem süngo aser totzü sector-i marutetra mapa kong nungi poktettsü? Ibayongji asenoki Assam nung ILP mebenoktettsü,” ta Sarma-i ashi.
6 committee-i ILP benoktsü asoshi benokba indang asüngdangba mapang Sarma-i, “ni iba committee nung züngsem kar den sensaksemogo aser tang tashi nung parnoki ashiba dak ajemdaker state nung ILP benoktsü asoshi kecha onük benoka mali,” ta ashi.