Assam nung India-Bangladesh arrtsü shibangtsü: Rajnath Singh

Guwahati, January 03 (Agencies): Deobar nü Union Home Minister Rajnath Singh-i Assam nung India-Bangladesh arrtsülen Karimganj sector semdangba sülen pai, 2016 küm nungsa nisungtem melamela senzüsenbongba arrtsü shibangtsü, ta metetdaktsü.
Home minister Rajnath-i anogo ananü Assam semdanga Deobar nü state tonga aruba sülen Karimganj district nung Stemerghat Border Out Posts (BOP) semdangogo.
Nisungtem melamela senzüsenbongba arrtsüji akhidang yongi shibanger lila, ta pai metetdaktsü.
Singh-i Stemerghat BOP semdangba mapang pa den Assam nungi Union Minister of State for Sports & Youth Affairs Sarbananda Sonowal, BJP lenir kar, All Assam Students’ Union (AASU) chief adviser Samujjal Bhattacharyya, Tir Dipank Nath aser General secretary Lurinjyoti Gogoi nungera liasü.
Iba dak sentakba nung AASU Tir, Dipank Nath-i, “Yaküm onoki New Delhi nung seminar ka ayonga agiba mapang pai onok den International arrtsü semdangtsü nangzük. Tanü pai semdangtsü atema aruogo. Onoki pa dang Karimganj nung open international border sayuogo. Iba arrtsüji takümsa shibangtsü ta union home-i shiogo,” ta ashi.
“Home minister-isa onok dang, Karimganj district nung arrtsülen shibangtsü atema onüktem yaküm November ita nungi Bangladesh sorkar den jembiba aser tajungtiba nung latetba onok nem metetdaktsüogo,” ta Nath-isa kanga pelaa ashi.
Yaküm August ita New Delhi nung All Assam Students Union (AASU)-i Assam Accord mapa kuma inyaktsü atema ayongba shisatokden sentong ka nung Singh densema liasü. Iba seminar nung Singh-i AASU lenirtem dang pai India-Bangladesh arrtsü semdangtsü nangzüka liasü.
Union minister-i Brahmaputra State Guest House, Guwahati nung state nungi tongtibang nisungtem ajurutsü sentong lir.
Hombar nü pai AASU lenirtem den India-Bangladesh arrtsülen Dhubri sector semdanga tensa reprangdangtsü aser iba district nung lokti senden ka nung jembiba sülen Delhi-i meyipa aotsü sentong lir.