Assam nung ‘JE alert system’ amshitsüla

Guwahati, June 26 (Agencies) : Regional Medical Research Centre (RMRC), Dibrugarh nung Scientist temi state health department dang Japanese Encephalitis (JE) kara putettsü atema ‘early warning system’ amshitsü shiogo.
RMRC scientist temi North Eastern Space Application Centre den lokteper JE prokshiba metettsü atema inyakyim ka tenzüka lir.
Iba inyakyim lapokba ajanga tesüiba mapang JE osang aser küm nung mezüng hopta 11 tsüngda JE prokshitsü aliba osang metetba nung yaritsü.
Iba inyakyim ya Dibrugarh, Sivasagar aser Tinsukia district nung benshitsü atema Assam sorkar nem 2014 küm amoktsü, ajisüaka tang tashi sorkari ibaji mapa küma mamshir. Parnoki iba ya mapa küma amshi asübo JE agi shirangba kanga ajema kümer lila, ta scientist temi ashi.
RMRC, Dibrugarh nung scientist tain aser early warning system yanglur rongnung tongti nisung, SA Khan-i, iba inyakyim ya tang kanga nungdak anungji state sorkari ibai amshitsüla, ta osangbener dang ashi.
“Iba inyakyim ya Dibrugarh dak rangloker lapok aser health department meyong IT system nung 2014 küm inoktsü. Sorkar ketdangsertem nem ibai amshitsü atema tesayuba agütsüogo. Iba ya yangludang sen aser nübu jenti laluogo anungji ya amshitsüla, ta Khan-i ashi.
Early warning system yagi aruyaa aliba tashidak komala ka asütsü ibaji puteter aser ibaji ajanga tashidak den raratsü renema atateter, ta pai shisem.
Iba system nung tesüiba küm 25 tsüngda JE agi kongshiba ajak inoka lir. Assam nung JE agi atongba osang ajak iba nung ya keta lir.
1996 nungi 2007 tashi nung Assam nunger nisung 800 dak tema JE aser AES tashidak agi taküm laluogo. Taküma June 25 tashi nung JE agi asür nisung 22 lir aser nisung 84 dak iba tashidak puteta lir.