Assam nung Karbi chuba Harsing Ronghang apu

Guwahati, May 23 (Agencies): Arishi küm 53 tain tribal chuba kati Assam nung arishi küm 33 tain tanur 4 tetsü ka den tashiyim agi shi nung medemba atema puogo.
Harsing Ronghang ya Tenüng atema chuba ta züngshiba (titular) Karbi nunger chuba lir. Pa Mongolbar anepdang tetsürlai FIR ka benokba sülen puogo.
Ronghang ya tangar kidangi temelaba melei atuba aser tashiyim agi shi nung medemba ken o nung aija puogo.
“Pa police-i anir arua puogo aser tang tetsürla temang tendangba osang atadar,” ta central Assam kübok West Karbi Anglong district nung Hamren police station in-charge Kamal Bora-i ashi.
Tetsürlai osang agütsüba ajanga ashiba agi, pa taoba Bodhbar aonung lar kidangi ao aser idakji pai la den tashiyim agi shi nung medem.
“Iba tatalokba sülen pa anepdang ki toktsür ao aser iba tatalokba shinga danga mashitsü asoshi pai tetsürla amokmeren. Ajisaka anogo anashi lir lai lar kiyongertem dang ashi aser iba osang iba tesem nung prokshi,” ta Bora-i ashi.
Iba keno dak sendakba nung jembishinütsü asoshi Hombarnü senden ka ayongzüka aka aser idakji pai tashimyim mapa inyakba nangzük. Tetsürlai iba sülen Hamren police station nung ken o ka agütsü.
Karbi Anglong tesem kong Karbi nunger timba alir iba tesem nung yimsüsüba maparen ya Karbi Anglong Autonomous Council (KAAC) kübok lir. Ajisaka tribal chuba yagi district head quarters Hamren tesem nungi Km 16 pilar aliba Ronghang Rongbong tesem nungi pai Karbi nunger sobaliba aser libaliro balala achaayanger.