Assam nung kin 6 nem ST jenjang agütsütsü memulunger

Guwahati, May 29 (Agencies) : Assam nung kin trok nem Schedule Tribe jenjang agütsütsü memulungertemi Coordination Committee of the Tribal Organization of Assam (CCTOA) ta ser telok ka tentetogo.
Assam kübok kin trok – Koch Rajbongshi, Moran, Matak, Tai Ahom, Chutia, aser Adivasi (tea tribes) nungeri parnok nem ST jenjang agüjang ta takhangba agüja arur.
Kin trok nem ST jenjang agütsütsü atema tatembang telemtetba ka magidang tamasa telok asemsü senden ka amentsüla, ta coordination committee ketdangpurtemi tebilemba metetdaktsüogo.
Assam kübok lendenlen aliba kin nem ST jenjang agütsüra, linük ajungalen timtem adoktsü, ta coordination committee chief convener aser All Assam Tribal Sangha general secretary, Aditya Khaklari-i ashi.
Kin trok nem Scheduled Tribe jenjang agütsütsü shisadangtsü atema Centre-i luden ka shim aser iba ludenji Special Secretary (internal security), Union ministry of home affairs, Mahesh Kumar Singla lenisüba kübok lir.
“Linük Temzüng ajanga item kin nem ST jenjang agütsütsü makok. Parnoki Scheduled Tribes nung lateta alibatem matonger. Ibaji atema Linük Temzüng yanglushitsüla saka iba jagi linük ajungalen timtem ang bener arutsütsü, kechiyong kin ajaki ST jenjang meshitsü. Nüngdak dang süra, parnok nem OBC jenjang agütsütsü atemabo onoki menokdanger” ta Khaklari-i yashi osangbener senden ka nung ashi.
Centre-i shimba ludeni Assam sorkar den asüngdangya kin trokji OBC nungi ST jenjangi melentsü, parnok taginüba kümzüka ayutsü, aser parnok nem shilem wazüka yutsütsü indang onüktem shisadanga inyaktsü aser May 31, 2016 tashi nung osang agütsütsü.