Assam nung kin 6 nem ST jenjang Dec nung agütsütsü akok

Guwahati (Assam), November 03 (Agencies): Assam nung Other Backward Classes (OBC) trok nem ST jenjang agütsütsüa akok, aser iba dak sentakba nung Brihostibarnü Tribal Affairs Union Minister, Jual Oram-i, state nung kin trok nem ST (Scheduled Tribe) jenjang agütsütsü atema shisadangtsü asoshi ita ishika jakdang tentetba committee-i taküm December ita tashi nung report agütsütsü, ta metetdaktsü.
Home Ministry nung Special Secretary (Internal Security), Mahesh Kumar Singla-i aniba committee-i iba atema Assam sorkar den tongtepratepa jembitsü aser item kin tang OBC jenjang aliba nungi ST jenjang agütsütsü asoshi tebilemba onüktem benoktsü.
Shillong nung anogo ananü International Seminar alidang jurila osangbenertem senden ka nung Oram-i, “Committee dang iba osangji ita asem tsüngda agüjang ta metetdaktsüogo aser tatemsabuba report ji taküm December ita tashi nungbo tembangtsü imlar,” ta ashi.
Iba committee-i shitakba agibo October 15 tashi nung Centre nem report agütsütsüla, ajsüaka December ita tashi mapang atsülangogo.
Union Minister Oram-isa, iba sülen report ji Inter-Ministerial committee nem agütsütsü aser parnoki iba report reprangshia iba atema maneni inyaktsü, ta metetdaktsü.
Taküm küm tetenzüklen Assam nung kin trok nungi teshimtet telok kati Union Home Minister, Rajnath Singh ajurua iba atema jembia liasü.
Ajisüaka tribal telok balalai tentetba Coordination Committtee of the Tribal Organisation of Assam (CCTOA)-ibo ibaji anema Centre aser state sorkar dang parnok nem Scheduled Tribe jenjang magütsütsüla, ta mepishiogo.
State nung Scheduled Tribe jenjang akhangertemji Koch Rajbongshi, Tai Ahom, Moran, Motok, Chutia aser Adivasi kintem lir.