Assam nung Kuki telungpur 3 khaset

Guwahati, April 3 (Agencies): April 2, 2017 anepdang Assam nung Army-i Kuki telungpur asem khaset.
Deobar anepdang züngia East Karbi Anglong district nung Red Horns Division nungi sepaitemi telungpur asem khaset, ta Defence PRO sangdong ka nung metetdaktsü.
East Karbi Anglong district nung Kuki nunger teimba sür aliba tesem nung telungpurtem lir ta osang tejangja angazükba sülen April 1, 2017 aonung sepaitemi iba tesem mita ao, ta sangdong nungsa ashi.
April 2, 2017 anepdang züngia Army telok jagi telungpurtem jenoka aliba ki tonga aodang, telungpurtemi injang khaloktsü. Iba mapang minute metsü shi khatepdang telungpur ana kahset aser ka kanga mejungi yirur lia angu, ta PRO-isa ashi.
Yirua aliba telungpur nem first-aid agüja anepalu saka pa len tom nung asü. Iba tesem nungi M-16 rifle ka, 7.62 mm rifle ka, hand grenades ana aser injang aika den sü tabentsü, combat uniforms, ammunition pouches aser chiyungtsütem ngutet.
Sepaitemi khasetba telungpurtemi Manipur nungi liasü aser iba ajanga North Eastern region nung telungpur teloktem sendaktepa aliba jungkai adoka sayur, Army osang ka ajanga metetdaktsüogo.