Assam nung küm 4 tsüngda telungpurtemi nisung 314 tepset

Guwahati, August 10 (Agencies) : 2011 nungi July 31, 2015 tsüngda Assam nung telungpur anema mapa inyakba nung telungpurtemi civil society züngsem 319 tepset aser telungpur 336 khasetogo, ta Hombarnü state Assembly nung metetdaktsü.
Yaküm December 23 nü NDFB (Songbijit)-i azütokshi mapa inyakba sülen Army aser paramilitary forces-i NDFB(S) züngsem 15 khaset aser 448 puogo, ta Agriculture Minister, Rockybul Hussain-i Chief Minister Tarun Gogoi tenüng nung metetdaktsü.
Assam nung teyakyak telungpur telok 8 lir aser telok 13-i sorkar den olemtep tagidak lir, ta Hussain-i AGP züngsem Kesab Mahanta-i asüngdangba asoshi telangzüba agütsü.
Ano, tesüiba küm pezü ser tesadang nung tatalokba balala nung nisung 6,098 asü, tashiyim agi tetsür raksatsüba ken o 8164, nisung pur aoba ken o 20,441, tashiyim agi sen meshiba ken o 5230, auyaba ken o 45615, teloki auyaba ken o 1188, gari auyaba ken o 15557 aser arasentsürtem tepsetba ken o 54 benoka liasü, ta Minister Rockybul Hussain-isa metetdaktsü.
Assam nung police stations 346 aser police outposts 220 lir aser police personnel sanctioned posts 75503 nungi tang teinyakdak nübo 60,244 lir aser mapa tazüng 15259 lir, ta Hussain-isa shisem.