Assam nung lemda-madar lakh 45 nem ita shia sen 1,000 agütsütsü

Silchar, February 28 (Agencies): State nung district 32 nungi lemda-madar nisung lakh 45 aliba nem taruba küm nungi nisung shia ita nung sen 1,000 teyari agütsütsü, ta Assam Chief Minister, Sarbananda Sonowal-i metetdaktsüogo.
Sorkar nungi teyari agir nema taküm küm asoshi sen 5,000 agütsütsü metetdaktsü.
Barak Valley tesem nung alir lemda-madar 1,200 nem Town Club moapu nung ‘artificial aids’ aser ‘assistive device’ lema agütsüba sülen, Sonowal-i iba osang sangogtsü.
Artificial Limbs Manufacturing Corporation of India, Cachar district ketdangsertem aser Social welfare department teyaritep nung iba sentong ya ayongzük.
“Sorkari ‘Sugam Assam’ sentong ka renemdar aser iba ajanga lemda-madar tem timtem melii sorkar office tem semdangtettsü,” ta Chief Minister-i ashi.
Barak Valley terenlok indang jembidang, “Lenmang tesendaktep asoshi sorkari kanga süoki yia inyaker aseer iba mapa atema sen crore 2,000 sanction süogo. Mapang talangka melie Barak ayung nung apu pezü yanglutsü,” ta Sonowal-i ashi.
Taoba Honibarnü Chengkuri Road anasa aliba tesem nung mi adoka ki-o-jen arungba mapang Mamata Das rongset, aser la kinüngbu, Shiv Charan Das nem teyari sen lakh 4, Sonowal-i agütsü.
“Sorkar mapa nung shilem pezü lemda-madar nem lemzüktsütsü asoshi sorkari temzüng tasen ka yakta sayatsü,” ta iba kasa sentong nung Union Minister, Social Justice & Empowerment, Thawarchand Gehlot-i metetdaktsü.