Assam nung lisopur shilem 90 ket nung ali patta mali

Guwahati, May 2 (Agencies): Taoba chief election commissioner Hari Shankar Brahma lenisüba kübok lisopur li kümzüka ayutsü asoshi state-i senotsü teyari agütsüa kümtetba committee ajanga asadangtetba agi, Assam nung lisopur 90 shilem ket nung permanent ali ‘patta’ mali aser kibong lakh 8 shibo parnok juri ali maka.
Nagaon district nung additional deputy commissioner-i ashiba agi, iba tesem nung ali shilem 70-bo lisopur masü saka bendanger li lir. Bendanger-i ali shilem paikaji atsüngbaji iba tesem nung dang asütsü, ta Brahma-i Deobarnü ashi. Iba committee ya February ita CM Sarbananda Sonowal tetuyuba nung kümteta liasü aser parnoki lisopur li kümzüka ayutsü asoshi lenmang bushia sorkar nem June ita tashi nungbo osang agütsütsü imlar.
“Assam ajunga nung arem, shiruru chiemdak aser tanga li dena sorkar ali bigha lakh 63 (1 bigha= 14,400 sq ft) ozüng alema atsünga lir. Kasa mapang nung lisopur lakh 7 nungi 8 shibo ali inch kata maka. Maneni lisopurtem shilem 90 ket nung ‘myadi patta’ (permanent land settlement) mali, saka eksonia patta (annual land settlement) dang lir mesüra sorkar ali atsünger dang lidar,” ta Brahma-i ashi.
Tinsukia, Dibrugarh aser Majuli district tem nung aliba lisopur aika, tetsü tebu mapang 1950 küm menoknok nung parnok li samaadok. Parnok ket nung kuli kaket mesüra alia mali, ta committee ajanga ngutet. Committee nem maneni British nunger mapang Assam Land & Revenue Regulation Act, 1886 reprangshia yanglushitsü asoshi tetuyuba agütsütsü atema nongloktsü.
Iba committee dentettsü asoshi telemtetba agidang Sonowal-i ashiba agi, sorkari ali dak sendakba nung sentong tasen yanglutsü asoshi jenjang agidar, kechiyong ali milera Assam kin samatsü aser lisopur li kümzüka ayutsübaji sorkar mapa tongtibangtiba lir.