Assam nung Mamata-i Modi’er sorkar aitsü

Dhubri, April 5 (Agencies): Assam aser New Delhi nung BJP-i aniba sorkartemi chichiba India sensotem pei li nung bendanger kümdaktsütsü atema tasa atonga inyaker, ta West Bengal Chief Minister Mamata Banerjee-i ashi.
“National Register of Citizens (NRC) nungi züngdokba nisung lakh 40 atema BJP lennir shingai ola madok” ta lai ashi.
Hokolbarnü Assam kübok Dhubri nung public sentong ka nung jembidang Mamata-i iba onük jembi.
“NRC nung nisung lakh 40 dak tema züngdokba osang angashidang ni kanga jashi. Ni ozü MLA aser MP kar Assam-i yok aser osang metetpeladaktsü. Sorkar ozü telok airport nungi meyok aser reshikangshi, saka onoki iba angbangyim mapa anema lungkak ait. Nenoki onok nem kodang vote magütsü saka nenok timtemdang onoki nenok den külemi noktak” ta West Bengal chief minister Mamata-i metetdaktsü.
NRC yanglushiba mapa aija Mamata-i “Assam nung final draft NRC sangdongba sülen nisungtem soseta asü” ta ashi.
“NRC nung nisung kar tetsü tenüng maliasü, karbo pei tanur mesüra kinungbo tenüng maliasü. NRC nung Muslim nunger tenüngtem züngdok aser sorkari tanurtem dena detention camps nung puok” ta laisa shisem.
“Citizenship Amendment Bill ya nisung mulungsentsü anema lir. CAB ajanga na küm 6 atema bendanger ka asütsü aser iba sülen senso akümtsü. Kechiba? Nai küm trok nungji kechi inyaktsü? Nü mapa, school aser nüngdakbatem bilemdangang? Iba ya kecha masü aka tasa tamajung ka dang lir” ta Mamata-i BJP aitsü.
Sen crore aika alangba Saradha chit fund miimmechi maparen atema laisa ashiba agi “shidi nung Assam finance minister Himanta Biswa Sarma-i shilem agiba jangjajangja shia lir saka pa memerenshir.”
“Prime Minister Narendra Modi-i tiyazü jembir. Taoba mapang Assam aser West Bengal tsüngda tesentaktep tajung liasü anungji nübortemi TMC nem vote agütsütsü ayongzüker” ta Mamata-isa mepishia metetdaktsü.
“Khen atema onok nem vote agüjang aser onoki nenok khurettem Parliament nung benoka jembitsü” ta laisa ayongzük.