Assam nung Maoists bulua kümdar: Gogoi

Guwahati, November 07 (Agencies): Assam Chief Minister Tarun Gogoi-i, state nung Islam telungpur aser Maoists tem kanga bulua kümdar ajisüaka sorkari parnok inyakyim nung kanga sashia tenük yokdar, ta ashi.
“Islam telungpur, Maoists aser telung nung alir telok balalai state nung timtem agütsütsü kanga meranger saka onoki kanga kümdanga mitdar,” ta Gogoi-i PTI dang ashi.
Pai, “Ni asembenren Chief Minister ka ama inyakdang telungpur tebilemtsü kanga ajema kümdaktsübaji takok tulutiba asütsü, ajisüaka ano tanga tashi kar ajanga state terenlok nung kanga timtem agütsütsü meranger. Ni aniba sorkari kanga nendaka yimsü asür aser teraksa madoktsü asoshi onoki teti mita alitsü,” ta ashi.
Gogoi-i, NDFB(S) aser ULFA(I) telok tem nungi lennirtem samatsüba aser apuba ajanga parnok kanga tashi mait kümdaktsüogo, ta ashi.
“Telok ana ya tesüiba mapang kanga sashia liasü saka parnok samaja aser apuba ajanga kanga tashi mait akümba sülen parnok lungjemtsü meranger,” ta paisa shisem.
Telungpur nütsüng ajema kümer alirtem ka küma lungjemtsü asoshi ULFA(I) nung lennir Paresh Barua-i anir United Liberated Front of South West Asia telok tentetogo, ta Chief Minister-isa ashi.
Gogoi-i, ni mezüng Chief Minister akümba mapang telungpur kanga bulua aliba ajanga state nung iba tebilemtsü tuluba liasü, ta ashi.
Paisa ashiba agi, state nung terenlok mapa ajak anenadoker liasü ajisüaka sorkari telungpur tebilemtsü kokteta ibaji takok ngutetogo. Ni ajanga iba takok tulu bener aru aser nüburtemi telungpur tebilemtsü joko amatokogo.
Sorkar lenisüba nung gari lenmang, kaketshisatsü, anema alibaren aser ‘e-governance’ den külemi aluyimba aser shiruru metsüba tsütsü yimtaklirtem nem terenlok jenti agütsüogo aser ibaji ajanga lanurtemi telungi aitsü mebilemer, ta Gogoi-i ashi.