Assam nung menoknok lendong nung nisung 2 asü, 70 yiru

Guwahati/Imphal, April 14 (Agencies): Bodhbar aonung Myanmar nungi tenzüka menoknok tesashi ka Richter scale 6.8 nung anokba ajanga Northeast India anokshitsüba lendong nung Assam state nung nisung ana asü aser nisung 70 dak tema yiruogo.
Iba menoknok anokdang British tamarener Prince William aser Duchess of Cambridge, Kate Middleton nata Assam nung aliba National Park, Kaziranga nung anenzüka liasü.
Myanmar tiyongtsü ser menoknok anokbaji Bihar, West Bengal aser Delhi-NCR nunga meteta liasü. Iba menoknok ajanga power supply, communications aser railway service nunga kongshi.
Ano tanga osang ka nung Manipur ketdangsertemi ashiba agi, menoknok ajanga Manipur nunga nisung 30 dak tema yiruba den külemi kiojen aika raksatsüogo, ajisüaka nisung asüba osangbo mali.
Iba menoknok ajanga Manipur nung ki, school ki aser shishilembaba tesem aika raksatsü, ta parnokisa ashi.
Manipur, Thoubal district kübok Khekman nungbo primary school ki rangben chirepba ajanga anasa aliba Jamir Khan’er ki raksatsü.
Myanmar nung nisung asüba osangbo mali, saka kiojen aika tera raksaba osang lir.
Myanmar nung menoknok lendong kanga bulur aser yasüng anokba kasa magnitude nung 2011 küm menoknok anokdang Thailand aser Vietnam na nung nisung 75 tashi asü.
Menoknok anoktsüji jilia metetzütetter, anüngji renema alitsüji tongtibang. Menoknok anoktsü jilia tetzütettsü atema US sorkari warning systems nung sen jenti indokdar.