Assam nung Naga nunger lushi Nagaland nem meyipa agüjang : UNTABA

Dimapur, March 12 (TYO) : United Naga Tribes Association on Border Areas (UNTABA)-i Ato Kilonser, Th. Muivah, NSCN(IM) aser Collective Leadership den ajurutepa senden ka amen.
Assam nung aliba Naga nunger lushitem Nagaland nem meyipa agütsütsüba aser tatembang yimten telemtetba ka magidang, Assam den arrtsü ken o angatetteptsü atema koba tashi inyakdar ta UNTABA-i asüngdangba onüktem atema iba senden ya amen, ta UNTABA sangdong ka nung metetdaktsü.
NSCN lennirtemi UNTABA pur den item onük atema kanga süoki ia tebilembatem lemsatep aser tang parnoki India sorkar den yimten ken o jembiba nung benoka timleni jembitsü ta nangzük, ta sangdong nungsa ashi.
UNTABA-isa Naga Peace Talk Interlocutor, RN Ravi den ajurutepa senden amendang, taoba mapang parnoki India sorkar dang Assam nung Naga nunger lushitem kibur shitakba ket nung meyipa agüjang ta akhangba indang onük nenshia metetdaktsü.
1947 küm 9 Points aser 1960 küm 16 Points Agreement tem nung nangzüktepa aliba ama iba mapa inyaktsüla ta UNTABA-i takhangba agüja lir.
RN Ravi den amenba senden nungsa NSCN(IM) den tang yimten ken o tejembidak indang osang metetpela liasü, ta UNTABA sangdong nung ashi.
Iba mapang Interlocutor-i, India sorkari iba onük atema temulung magütsür ta ashi aser Naga nunger taginüba tongtsütsü atema maparen timi inyaktsü ta paisa tenangzükba agi.
Iba onük atema pai sendaktepa aliba nisungtem dang asüngdangyatepa mapa inyaktsü, ta Ravi-i nangzük, ta UNTABA sangdong nungsa ashi.