Assam nung NDFB(S) telungpur ana kahset

Guwahati, August 29 (Agencies): Adivasis tem azüdokshitsüba atema bushia aliba NDFB(S) züngsem ana tanü Honibar nü Assam Police aser Army na lokteper mita aoba mapang kahsetogo.
Osang tejangja angashiba sülen Honibar anepdang Assam police aser Army na lokteper Chirang district nung aliba Oxiguri yimtsüng nung mita oa liasü, ta Inspector General of Police, BTAD, L R Bishnoi-i ashi.
“Iba mita aoba mapang kahtepdang NDFB(S) züngsem tesashi ana kahsetogo,” ta pai ashi.
Tasür anaji Gwndai aser Junthi ta jangjaogo aser tenaprongla NDFB(S) nung ‘platoon commanders’ liasü.
December 23, 2014 nü Adivasis tem azüdokshitsüba nung parnok ya yakbang ser inyakba lir.
“Parnoki lendong agütsüba mapang police den tesendaktep lir ta temulung malemba ajanga class 10 nung azünger, kaketshir Priya Basumatary-ia tepset,” ta Bishnoi-i ashi.
Police ketdangser taintem-i, M-16 prangpong ka, AK-47 prangpong ka, injang asepba kar, pistol ka, injang aika aser parnok meyong oset ishika iba tesem nungi nguteta lir, ta ashi.