Assam nung NHPC mapatong anema lungkak aiter

Tezpur, October 11 (Agencies) : NHPC-i Gerukamukh nung aliba Lower Subansiri Hydroelectric Power Project-i osettsüset belenba anema Assam kübok Lakhimpur district nung anogo tenetnü mokdangba tanü nungi tenzükogo.
Assam-Arunachal Pradesh arrtsü anasa aliba National Hydroelectric Power Corporation tesemi osettem bener aoba truck garitem lungkak aitertem sota lir, ta police ketdangser kati ashi.
Lungkak aitba teloktem rongnung Asom Jatiyatabadi Yuba Chatra Parishad (AJYCP), All Assam Student Union (AASU) aser Krishak Mukti Sangram Samity (KMSS) nungertem dena lir, ta paisa ashi.
Taoba Brihostibar aonung Gogamukh nung khu abenba truck gari ka rongdoktsü aser iba dak sendakba nung truck gari anisangi kuli agütsüba sülen nisung pungu pua lir, ta Lakhimpur Superintendent of Police, Brajenjit Singha-ia metetdaktsü.
Gerukamukh nung 2,000MW project ya December 2011 nungi meinyakteti anendaka lir.
Iba mapatong atema tzünoktang yangluba ajanga ayong tsünglanglen alirtem atema lendong bener arutsütsü ta shia telok balalai iba mapatong anema lungkak aiter.