Assam nung nisung 20,000 jungnüa bendangertem ta bushitet

New Delhi, Aenjeti (January) 3 (Agencies): Luchii (December) 31, 2017 ayaterm nung Assam-i mezüng draft NRC sayaba nung nisung crore 1.9 shi dena lir saka ano nisung 20,000 shi ka züluaka mali.
Lok Sabha nung Minister of State of Home Affairs, Kiren Rijiju-i tasüngdangba ka langzüdang, (Mongputeni) October 2017 tashi nung doubtful voters 19,612 tashi Foreigners Tribunal of Assam ajanga bendangertem ta sangdongogo, ta metetdaktsü.
All India United Democratic Front lennir, Badruddin Ajmal-i Rijiju dang ‘doubtful voter’ ta shitettsüsa koma kuli bushir aser Foreigners Tribunal (FT) ajanga ‘doubtful voter’ kwika bushiteta lir ta asüngdang.
‘D’ voters ta lemzüktsübaji tim dang aser iba nung nisungtem mezüngmeshiba kecha mali. ‘D’ voters ta ajartem pua mayur saka bendangertem ta ajartem dang detention centres nung ayur, ta Rijiju-isa ashi.
1997 küm nungi Assam nung Home aser Political Department-i electoral rolls meyipa reprangshimba mapa tenzük aser iba mapang India senso indang kulikaket magütsütetertem nem ‘D’ (doubtful/disputed) zülujang lemzüktsü.
Iba nungji ajemdaker Electoral Registration Officers (EROs)-i India senso jangjashitsü atema Foreigners Tribunal dangi ken o aben.
ERO temi nisung tenüngtem tribunal nem agütsütsü lemtetba sülen parnoki item ken o ji bangdak ketdangsertem (district nung Superintendent of Police) dangi aben, ta Union Minister Rijiju-i ashi.
Tribunal temi obendang/tetuyuba agütsüba nung ajemdaker India senso ta jangjaba sülen ‘D’ zülujang agien mesüra electoral rolls nungi agienba tenüngtem züluok, ta paisa shisem.
2011 küm Gauhati High Court ‘D’ voters ta lemzüktsürtem Foreigners Tribunals dangi belentsü aser parnok detention camps nung ayutsü tetuyuba agüja liasü.
Iba telemsa nung Bengali Hindu nunger, shirnok 1971 matongdang aser süir East Pakistan aser Bangladesh nungi arurtem dak tuluba kongshi.
Tang bendangertem ta jateta alirtemi High Court mesüra Supreme Court tsüngdang ken o benoker angadangba sülen ang foreigner tribunal ajanga obendang agütsübaji agientsü akok.