Assam nung nisung ka injang bener apu

August 13, 2017 (Agencies): Government Railway Police (GRP) puri Tripura nunger ka Assam nung injang aika bener puogo. Independence Day madong tsüngda timtem lendong adokdaktsütsü asoshi sentong nung pa item injang belena liasü, ta Deobarnü police temi metetdaktsü.
“Yimya ama bushisüngdanga aoba mapang ka nung GRP sepaitemi arishi küm 34 tain Naresh Chakma Badarpur railway junction nung Honibarnü puogo. Pa ket nung injang 600 dak tali bena lia ngutetogo,” ta Tripura police ketdangser kati ashi.
Police temi Chakma indang yangku bushia aliba mapang nung pa den külemi alisang Biswajoy Chakma jena oadok.
“Biswajoy ket nunga prangbong kar aser injang aika bena liasü. Tenaprongla ya Gomati district kübok Natun Bazar yimtsüng nung alir,” ta ketdangseri ashi. Paisa ashiba agi, Independence Day madong tsüngda timtem lendong adokdaktsütsü asoshi sentong aliba Naresh-i nangzüka liasü.
Ajisüaka tang tashi nung pa National Liberation Front of Tripura (NLFT) nungi asü masüra mejangjai lir.
“Naresh-i ashiba agi, Biswajoy tena Comilla (eastern Bangladesh) nung tesep ka nung jenoka liasü. August ka nü tena Meghalaya arrtsülen nungi India-i ait aser iba sülen Dimapur (Nagaland)-i injang alitsü asoshi ao kong tenadi prangbong balala atema Myanmar nunger prangbong injang shibelener ka ket nungi injang tapu balala alia liasü,” ta ketdanserisa ashi.
NLFT telungpurtem aika Bangladesh nung tesep balala nung prangbong balala amshitsüba training agir. Bangladesh aser India na aartsü km 1,880 lir aser iba nung Tripura den 856 km, Meghalaya den 443 km, Mizoram den 318 km aser Assam den 263 km ta lir.
NLFT pur ya 1997 küm Union Home Ministry-i shibangtsü. Parnoki India nungi Tripura nüjiso akhangertem lir.