Assam nung NSLA telungpur ka kahset

Guwahati, January 13 (Agencies) : Assam kübok Kokrajhar district nung Bodbarnü police-i National Santhal Liberation Army (NSLA) telungpur ka kahset.
Osang tejangja ka angazükba sülen police-i Borbadha yimdak mita ao aser idangji telungpurtem den kahtepdang ka yirutsü, ta police otongdar kati ashi.
Iba tatalokba sülen pa Gossaigaon Civil Hospital-i anir ao saka idakji pa asü, ta otongdarisa ashi.
Iba nisungji Ram Hemrom (Lasar) ta jangjaogo aser kahtepba tesem nung 7.65 pistol ka, grenade 2, injang rounds 2 aser injang tazüng ana ngutetogo, ta police-isa ashi.
Ano, tanga tatalokba ka nung Sibsagar district kübok Changmaibari tesem nungi police-i ULFA den yariteper ka apu, ta Assam police-isa metetdaktsü.
Iba nisung ya Babul (Jan Dihingia) ta jangjaogo aser pa ket nungi sen lakh 7.50 aser SUV gari ka ngutetogo.