Assam nung ochimashi kanga ajema kümogo: Sonowal

Guwahati, April 30 (Agencies): Assam Chief Minister, Sarbananda Sonowal-i, state nung ochimashi jenjang kanga ajema kümogo, aser par sorkari ochimashi anema maneni raratsü, ta metetdaktsü.
Yashi Guwahati nung state Excise Department indang website, ‘Excise Online’ lapoktsüba sentong nung jembidang BJP lenir aser CM, Sonowal-i, “State sorkari kanga meranga inyakba ajanga state nung ochimashi mapatem- 2005 küm shilem 34 aliba nungi 2017 kümbo shilem 18 dang kümogo, aser ibaji Assam nüburtemi longjemer inyakba ajanga lir,” ta metetdaktsü.
Paisa gari 62 semzükja liasü, aser item gariji department indang field staff temi excise ozüng alema inyakba mitba maparen nung amshitsü.
Sonowal-i, “Asenoki alima tatidang balala mepaidoktetba ajanga ochimashi ya adoker. Temesüzükbaji lenmang balalalen nungi arutsü, saka asenoki taginüba azüoktetra ochimashi nokdangtettsü,” ta shisem.
Excise Dept-i saru saruba nung shilem 20 timba küma jenjang tajungba kümdaktsüba atema pai department nema tenüngsang agütsü.
Paisa Excise Department-i ‘Digital India’ mapatong inyakba atema pelaba lemsatepba den külemi, tang online lapokba ajanga yimsüsübaren tashi aittsü aser ochishiba taliba akumtsü, ta metetdaktsü.
“Ato kilonser, Narendra Modi-i digital India asangsang nung ataloktsü atema benokba nung state Excise Dept-i mera agia inyakba atema pelar,” ta paisa shisem.