Assam nung ochimashir BJP lennir ka anentsü

Guwahati, June 25 (Agencies): Assam nung BJP indang Barpeta district unit-i Barpeta Nagar Mandal committee indang president mapa nungi anentsüogo.
BJP Barpeta Nagar Mandal committee president Mukut Ranjan Das aser lottery maparen nung shilem agir Madhu Das na jembiba audio clip ka social media nung prokshiba sülen Mukut mapa nungi anentsü.
Iba audio clip nung Mukut-i Madhu dang sen lakh 5 meshir. Barpeta district nung ozüng alema lottery asayadaktsütsü atema pai senji meshi. Idangji Madhu-i sen lakh 2 agütsütsü molunga agizük.
Assam nung BJP sorkari ‘zero tolerance’ yimyim agüja lir aser iba audio prokshiba sülen nübortemi BJP dang asüngdangtsü tenzük. Parnoki 2016 küm “parivartan” Assamese nung temelenshi bener arutsü nangzüka liasü.
“Nai ozüng alema lottery asayartem dang nugi sen meshiba ajanga party tenüng menüktsüogo. Anungji na BJP Nagar Mandal president mapa nungi anentsür aser anogo 7 tsüngda nü dak kechiba temerenshi malitsüla ta asüba kuli agütsütsü tuyur” ta BJP Barpeta District unit president, Sankar Chandra Das-i ashi.
Nowgong Lok Sabha constituency nung Lok Sabha MP aser taoba Minister Pradyut Bordoloi-ia tawa tu Assam CM Sarbananda Sonowal-i Margherita Assembly constituency nung ozüng alema nakmati atuba maparen nung shilem agir ta tai tonglokja lir.